Kəsmikli, kişmişli keks resepti
Directions
Evinizdə un, şəkər tozu, yumurta varsa rahatlıqla sadə bir keks hazırlaya bilərsiniz. Əlavə olaraq bu kekslərə kəsmik, cem, şokolad əlavə edib fərqli dadlar yaratmaq heç çətin deyil. Bu gün biz sizə kişmiş sevənlər üçün Kəsmikli, kişmişli keks hazırladıq.
Reseptlərimiz haqqında fikirlərinizi bildirməyi unutmayın. Hər bir xanımın fikri bizim üçün çox önəmlidir.
Keks resepti tərkibi
300 qr un
10 qr kərə yağı
300 qr şəkər tozu
250 qr kəsmik
3 ədəd yumurta
½ stəkan süd
100-150 qr kişmiş
2 ç/q qabartma tozu
Kərə yağını əvvəlcədən soyuducudan çıxardın. Otaq temperaturunda yumşalmış olmalıdır. Daha sonra yumşalmış kərə yağını şəkər tozu ilə birlikdə mikserlə qarışdırın.
Şəkər tozu və kərə yağı bir-birinə yaxşı qarışdıqdan sonra buraya kəsmiyi əlavə edin. Əgər kəsmiyiniz çox qurudursa, buraya biraz süd əlavə edə bilərsiniz ki, xəmiriniz çox möhkəm alınmasın.
Bu qarışıma 3 ədəd yumurtanı əlavə edin.
Daha sonra qabartma tozunu una əlavə edib qarışdırın. Unu ələkdən ələyə də bilərsiniz. Xəmiri qarışdıra-qarışdıra unu əlavə edin. Hamısını birdən əlavə etməyin. Unun miqdarı sizin qarışımınız üçün çox ola bilər.
Əgər xəmiriniz yenə də qatı alındısa, biraz süd əlavə edə bilərsiniz.
Xəmiri çox yaxşı qarışdırmaq lazımdır. Hazır olan xəmir qatı xamaya bənzəməlidir.
Kişmişləri təmizləyib yuyun. Bir müddət qaynar suda saxlayın. Daha sonra xəmirə əlavə edin
İndi isə keksi bişirəcəyimiz qabları hazırlayaq. Əgər slikon qablardan istifadə edirsinizsə, onların içinə nəsə vurmaq lazım deyil. Digər qablardan istifadə edirsinizsə, onların içini kərə və ya duru yağla yağlayın.
Xəmiri keks qablarına tökdükdə çalışın qabın ⅔ hissəsini doldurun. Çünki keks bişdikcə onun həcmi artacaq.
Sobanı 200 dərəcədə qızdırın. Keksləri 30-40 dəqiqə bişirin. Kekslərin bişdiyini yoxlamaq üçün 1 ədəd diş çöpünü keksə batırın. Çöp keksin içindən quru çıxmalıdır.
Hazır olan keksləri süfrəyə isti-isti və ya sərin formada verə bilərsiniz.
Nuş olsun!
